O concello do Rosal saca a licitación as obras de reparación de case 12.000 m de camiños danados polas inundacións
Os traballos terán un custe de 140.000€ e están financiados pola Deputación de Pontevedra
O Concello do Rosal continúa avanzando no seu programa de intervencións nos camiños rurais con novas obras de mellora nos camiños de Canas e Morraceira e unha parte da Estrada de Couselo dende o cruce entre o camiño Barriños e o camiño Couselo de Abaixo ata o camiño Vilariños, en Fornelos.
Así, o Goberno municipal vén de sacar a licitación os traballos de reparación de case 12.000 metros cadrados de camiños co obxectivo de “aumentar a comodidade e seguridade viaria en tres camiños que resultaron danados polas fortes choivas ocasionadas o pasado Nadal, ao tempo que se renova o pavimento, deteriorado nalgunhas zonas”, como explica a alcaldesa Ánxela Fernández Callís.
As obras, que terán unha duración de tres meses, saen a contratación por case 140.000 euros financiados ao abeiro dunha subvención da Deputación de Pontevedra para a reparación de danos causados polas intensas choivas de decembro de 2022, que causaron graves estragos en bens, equipamentos, infraestruturas e instalacións municipais.
Aínda que os tramos que se procederá a arranxar non presentan danos estruturais, si é necesario reparar as zonas deterioradas que poden afectar á seguridade da circulación renovando a superficie da calzada, o que permitirá mellorar as súas características funcionais así como a súa durabilidade.
O concello indica nun comunicado que as persoas e empresas interesadas poderán presentar as súas propostas ata o vindeiro 30 de outubro.
