Rubén Arroxo: "Que lle pasa á Xunta de Galicia con Lugo?

Lugo

"Que lle pasa á Xunta de Galicia con Lugo?" Esta é a pregunta que o voceiro do BNG, e tenente de alcalde, Rubén Arroxo, se fai para atopar unha resposta que xustifique "o pouco investimento" que se fai dende a Xunta de Galicia na capital lucense.

Arroxo afea ao goberno de Alfonso Rueda a súa escasa implicación no desenvolvemento das festas patronais de Lugo: o San Froilán. "Para eventos coma o festival 'O Son do camiño' a Xunta abona dous millóns e medios de euros, pero para o noso San Froilán 25.000 euros". Unha cantidade que considera mínima xa que "non da nin para pagar a metade do caché dun artista".

Dos 750.000 euros que o concello conta para investir na confección do programa de festexos do mes de outubro, 30.000 son aportacións de empresa privada, 25.000 da Xunta e o resto, di, sae das arcas municipais.

Malia que dende a área de cultura do BNG insisten en que esta é "das mellores programacións dos últimos anos",o certo é que o orzamente é considerablemente menor ao do pasado 2022, que roldaba o millón de euros.

"Teremos espectáculos itinerantes polas rúas, maxia, música de todos os estilos con grupos como Baiuca, la MODA, Eliades Ochoa... un cartel moi completo e onde tamén pensamos nos nenos e nenas de Lugo", dixo Arroxo.

Únete al canal de WhatsApp de la SER

Rolda Leste 2.0

Na súa visita ao Hoy por Hoy Lugo, Rubén Arroxo respondeu atónito ás declaracións da conselleira de insfraestruturas, Ethel Vázquez. A popular afirmou nos micrófonos de Radio Lugo SER que "hai 20 millóns de euros parados porque o Concello non nos propón un trazado alternativo ao que nós damos. Xa que non queren o que nós deseñamos, que nos digan que queren e onde queren modificalo para poder avanzar", sentenciou.

Porén, a alcaldesa de Lugo, Lara Méndez, acusou á Xunta de Galicia de non estar "a facer o seu traballo", xa que esta é "competencia do organismo autonómico e non do goberno local". Dende o bloque, Arroxo tamén respondeu indicándolle onde poden investir "se o problema son os cartos retidos". "Que teñen 20 millóns parados? Marabilla! xa lles dixemos que poden investilos no barrio de A Tinería, que teñen abandonado dende hai décadas", denunciou.

Dende o BNG denuncian o "abandonadas que están as conexións en xeral da cidade" co resto do territorio provincial e nacional. "Vas a Chantada e é como ir no Dragon Khan, as pirámides exipcias tardaron menos en facerse que a conexión con Santiago, hai un ano caeu unha ponte en Pedrafita e así seguimos...", describe.

Para Arroxo a atención que se presta, en xeral, á cidade é mellorable e "exemplo é que somos a única capital de provincia sen conectarse en tren".