A VIII Semana da Ciencia arranca o día 28 en Salvaterra
Do 28 ao 31 de marzo o instituto da vila encherase de actividades e palestras
O Concello de Salvaterra de Miño colabora na VIII edición da SEMANA DA CIENCIA que se celebrará desde o martes 28 ao venres 31 de marzo no instituto da localidade. O fío condutor das xornadas é a ciencia relacionada coa Saúde Mental.
O IES de Salvaterra contará, por exemplo, con charlas sobre produtos tecnolóxicos creados para persoas con discapacidade funcional, saúde mental e alimentación ou unha charla para as familias sobre o acceso a dispositivos na adolescencia.
En canto aos xogos, ademais dos clásicos da Semana da Ciencia, haberá outros específicos arredor da saúde mental e do funcionamento do cerebro humano, así están organizando un trivial sobre ciencia e saúde mental, neste caso creado polo profesorado. Tamén haberá un concurso dirixido aos máis de 600 alumnos e alumnas do centro e no que colabora o Concello de Salvaterra de Miño.
Polos distintos espazos do centro tamén haberá exposicións e postos nos que o alumnado amosará os seus experimentos e aprendizaxes ao tempo que outros mostran as súas investigacións a modo de vídeo ou podcast monográficos sobre o coidado da saúde mental presentando o proxecto “Naturalmente” tanto na radio nos recreos como nalgunhas clases.
As actividades poderán ser consuladas na web do centro educativo.
