María Neira, directora saúde OMS: "Retirar coches das cidades da votos"

Vigo

A directora do Departamento de Saúde e Medio Ambiente da Organización Mundial da Saúde (OMS), María Purificación Neira González, instou este venres dende a Facultade Ágora da Deputación aos alcaldes e alcaldesas da provincia a crear cidades saudables que prioricen ás persoas, e á cidadanía a escoller a representantes políticos que presenten as mellores planificacións urbanas en beneficio da saúde e a biodiversidade.

Segundo a doutora Neira, o papel de alcaldes e alcaldesas é fundamental á hora de xestionar políticas de mobilidade, transporte público, de planificación urbana e espazos públicos, polo que instou a utilizar argumentos económicos, de saúde, e tamén electorais para que estes aposten por modelos saudables.

“Nós dicimos que os responsables municipais son ministros de saúde aínda que eles ou elas non o saiban, porque teñen nas súas mans a capacidade de crear as condicións que van influenciar dunha forma importante a saúde e benestar das persoas”, subliñou.

Asegurou de forma taxativa que “mellorar as condicións de vida nas cidades, de aparcamento, de transporte, dá votos, crédeme!” e aínda que recoñeceu que ao mellor os primeiros días comerciantes do centro protestan se se quitan os coches, poucos meses despois están totalmente de acordo: “Hai milleiros de experiencias arredor do mundo onde os que protestaron cando se quitou o tráfico meses despois non querían volverían atrás”.