Piñor abre para acoller aos pacientes positivos das residencias
Con esta nova unidade xa son dous os dispositivos de soporte dedicados a este fin
Piñor abre para protexer aos mais "vulnerables" ante o coronavirus / Creative Commons
Ourense
O antigo hospital de Piñor, que ven de ser habilitado como área de expansión segundo o Plano de Continxencia da Área Sanitario de Ourense, Verín e O Barco de Valdeorras, en previsión da necesidade de mais camas, na actual emerxencia sanitaria, ven de abrir na tarde de onte as súas portas para funcionar como Unidade Residencial Medicalizada, co obxectivo de atender axeitadamente aos usuarios positivos a Covid-19 de residencias da provincia sen capacidade asistencial.
Dez dos pacientes con diagnóstico positivo a Covid-19, da Residencia a Nosa Señora de Fátima de O Barco de Valdeorras, serán trasladados a nova unidade dotada con 64 camas e persoal propio da Área Sanitaria, nun equipo multiprofesional composto por celadores, técnicos de coidados auxiliares de enfermería (TCAE), persoal de enfermería, e persoal de medico.
A nova Unidade Residencial Medicalizada está plenamente integrada, como unha unidade mais do Hospital Universitario de Ourense, centro desde o que se lle dará cobertura tamén por parte dos servizos diagnósticos e centrais, como Farmacia Hospitalaria, Recursos Materiais, Loxística, Mantemento, Cociña, etc.
Con esta iniciativa, preténdese dar unha resposta sanitaria axeitada ás actuais circunstancias desta emerxencia sanitaria, especialmente dedicada aos maiores institucionalizados, procedentes desta ou doutras residencias, públicas e privadas, da provincia.
Esta decisión xurde da intervención, o sábado, da residencia de maiores Nª Sª de Fátima do Barco de Valdeorras, por parte da Xunta de Galicia, coa intención de preservar a saúde de todos os seus residentes.
Con esta nova unidade xa son dous os dispositivos de soporte dedicados específicamente na nosa provincia aos maiores procedentes de residencias, que se ven a sumar a Residencia Integrada de Os Milagros.
