Aparece morta unha balea de gran tamaño na praia de Valarés

Ponteceso

Unha balea de gran tamaño apareceu na praia de Valarés. Trátase dun macho de balea común duns 18 metros de longo e de entre 15 e 20 toneladas de peso que varou morto neste areal de Ponteceso. Membros de Protección Civil e persoal do Concello, coordinados polos biólogos do CEMMA, encargáronse de suxeitalo con cordas para evitar que a marea o devolva ao mar mentres estudan como retiralo da praia.

A intención do alcalde, Lois García Carballido, é conservar o esqueleto e espera contar con axuda da Deputación e Xunta. Trátase da segunda balea común que vara esta semana nas praias da Costa da Morte, xunto á cría de 6 metros que apareceu o mércores en Nemiña (Muxía). A pesar da intensa choiva, son centos os curiosos que se achegaron esta mañá a Balarés.